domingo, 23 de noviembre de 2008

Unha manifestación pide en Ferrol mellores infraestruturas

Máis de mil persoas manifestáronse este domingo na praza de Armas de Ferrol chamados pola Asociación Impulsora do Plan Ferrol, integrada por sindicatos e empresarios da comarca. A concentración esixiulle ao goberno español e á Xunta que dote a comarca de infraestruturas como o tren ao porto exterior ou a vía de alta capacidade da Costa.

A manifestación estivo encabezada polos representantes comarcais dos sindicatos CIG, UXT e CCOO, polo presidente da Cámara de Comercio e mais os responsábeis das asociacións de empresarios CEF e Cefeor, portando unha faixa coa mensaxe "Polo cumprimento dos compromisos con Ferrol, Eume e Ortegal".

A protesta partiu pasado o mediodía do peirao de Curuxeiras e rematou na praza de Armas, despois dun percorrido polas principais rúas ferrolás, nas que se lle foi sumando máis xente. Estiveron nela os alcaldes socialistas de Ferrol, Fene e Cedeira, representantes de Terra Galega de Narón e de Neda e os rexedores populares de Pontedeume, Ortigueira e Cabanas.

O BNG desmarcouse da mobilización porque considerou que a prioridade para a comarca é a construción naval civil na antiga Astano, e que esta petición non se pode incorporar só de xeito parcial.
http://www.vieiros.com/nova/70433/unha-manifestacion-pide-en-ferrol-mellores-infraestruturas

No hay comentarios: