López Garrido argumentou que o tema de Navantia é tecnicamente complexo e ten moitos problemas de carácter legal.

Na Comisión de Comunidades Autónomas do Senado, o Secretario de Estado para a UE, Diego López Garrido, asegurou na súa resposta ao senador do BNG, Xosé Manuel Pérez Bouza, que Santiago de Compostela será sede de importantes xuntas na Presidencia española da UE. Ademáis, díxolle ao senador do BNG que o Xacobeo "estará moi visíbel na Presidencia española da UE".

O senador do BNG dirixíase ao Secretario de Estado para a UE para pedirlle, entre outras cuestións, que se promovese o Xacobeo no semestre de Presidencia española da UE e que Santiago acollese algunha das xuntas de máis alto nivel da UE. A resposta de Diego López Garrido neste sentido foi positiva. Porén, noutras demandas do BNG como a referente á volta de Navantia Fene á construción naval civil, a resposta do alto cargo do Goberno de Zapatero foi decepcionante. López Garrido argumentou que o tema de Navantia "é tecnicamente complexo e ten moitos problemas de carácter legal". Só dixo que se traballará intensamente.