Fernando Branco (BNG)
Diferentes voceiros do Goberno da Xunta e do PP
veñen de xustificar o seu voto contrario nos Orzamentos galegos ás
emendas do BNG que solicitaban o cofinanciamento do dique frotante de
Navantia e o Centro de Reparacións Navais na ría de Ferrol, argüíndo que
son actuacións que lle corresponden á Sepi, é dicir, ao Goberno
Central.
Resulta preocupante a perda de memoria sobre
algunhas cuestións. A primeira é que as dúas emendas correspóndense con
promesas feitas polo PP en diferentes campañas electorais, o Centro de
Reparacións Navais, que segundo eles ía crear 2.000 postos de traballo
directos, era o primeiro compromiso de Feijoo cando anunciou o seu
«contrato con Ferrol» no ano 2009.
O dique frotante foi a estrela na última campaña
electoral, na que o Conselleiro de Economía e Industria anunciou en
repetidas ocasións o seu apoio, e até o Parlamento Galego aprobou varias
iniciativas por unanimidade sobre esta tema, sen que daquela se
matizase ou cuestionase a súa viabilidade.
Tamén esquece o PP que Navantia é unha empresa
pública e, en cumprimento da Lei do Sector Naval de Galiza, impulsada
por unha Iniciativa Lexislativa Popular desde esta comarca, a Xunta debe
reclamar o seu papel e súa responsabilidade como Administración
Pública. Mesmo agora, a situación para o PP é máis favorábel, toda vez
que non vale a excusa do Goberno central, que semellaría ser «amigo»...
Logo ¿onde están os problemas para desenvolver estas actuacións
industriais que son vitais para a comarca?, ¿ou o de antes só eran
promesas electorais?
Na situación crítica que vive a comarca, non son de
recibo desculpas formais. Desde que goberna Feijoo o paro na comarca
incrementouse nun 17%, perto de 3.000 persoas máis. A maiores -aínda que
menos coñecido- en só dous anos perdemos uns 1.700 habitantes, cifra
superior á de algúns concellos da comarca.
Volvendo ao tema: o PP sigue mantendo que se fose
preciso non habería problemas para apoiar o dique frotante (do Centro de
Reparacións xa non fala), mais oculta que o orzamento do Igape minórase
para o ano 2012 nun 45%, é dicir, terá 118 millóns de euros menos que
este ano. Así, ante a grande limitación financeira que vai ter este
organismo, era importante que recollese partidas para o dique e para o
Centro de Reparacións.
Mesmo o PP podería ter discutido e negociado as
cantidades que consignaba o BNG, mais non foi así; e no Parlamento non
deu ningunha explicación máis que o voto en contra.
Noutra manobra de despiste, novos anuncios tapan as
promesas incumpridas. Agora o conselleiro de Economía e Industria
fálanos doutra «versión actualizada» do Plan Ferrol, cando seguimos á
espera da proposta industrial que o Goberno Feijoo, logo dun Consello da
Xunta realizado en marzo en Ferrol, anunciara para antes do verán. De
novo, as promesas suplen aos compromisos.
No hay comentarios:
Publicar un comentario